جاہل شوہر قبول نہیں، بھارت میں لڑکی کا شادی سے انکار

ممبئی: بھارت میں لڑکی نے لڑکے کے پڑھا لکھا نہ ہونے کی وجہ سے عین پھیرو ں کے وقت شادی سے انکار کر دیا۔

کہتے ہیں تعلیم سے شعور آتا ہے اور شعور سے زندگی کے فیصلے کرنے میں مدد ملتی ہے،ایک ایسا ہی فیصلہ بھارت کے علاقے بلیا کے ایک گاؤں کی لڑکی نے کیا۔

جس کے ہاتھوں پر مہندی سجی تھی اور وہ دلہن بنی ہوئی تھی، منڈپ سجا تھا کہ گڑیا نے پھیروں کے وقت شادی سے انکار کر دیا، وجہ تھی لڑکے کا پڑھا لکھا نہ ہونا۔

گڑیا کے ماں باپ بھی اپنی لڑکی کے اس فیصلے سے متفق ہیں، ان کا کہنا ہے پڑھی لکھی لڑکی کی قسمت جاہل لڑکے سے شادی کر کے کیوں پھوڑیں۔

 اس صورتحال میں لڑکے والوں کے کئے کرائے پر پانی پھر گیا، لڑکے کی ماں نے گڑیا کی شادی اپنے چھوٹے بیٹے سے کرنے کی پیش کش کی لیکن بارات کو خالی ہاتھ ہی واپس لوٹنا پڑا۔

Comments