انقرہ: ترکی کے سیاسی منظرنامے کی قد آور شخصیت سابق صدراوروزیراعظم سلیمان دیمریل انتقال کرگئے، ان کی عمر 90 سال تھی اوروہ نصف صدی سے ترکی کی سیاست میں متحرک تھے۔
سلیمان سیمریل ترکی کے سیاسی افق میں انتہائی اہم شخصیت تھے انہوں نے پانچ بارملک کی عنان ِحکومت بحیثیت وزیراعظم اپنے ہا تھ میں لی جبکہ ایک مرتبہ ملک کے صدر بھی رہے۔
ذرائع کے مطابق وہ سانس کے شدید مرض میں مبتلا تھے اور ا ن کی موت انقرہ کے نجی اسپتال میں حرکتِ قلب بند ہوجانے کے سبب ہوئی۔
اپنے کیرئر میں انہوں نے دوبار ملٹری مارشل لاء کا مقابلہ کیا اورسلامت رہے۔
سلیمان چرواہے کے نام سے شہرت پانے والے سلیمان دیمریل اپنی ذہانت اور قابلیت کی بنا پر مشہور تھے اور جدید ترکی کو مشکل حالات سے نکالنے کا سہرا آپ کے سر بندھتا ہے۔
آپ کی زندگی کے آخری سالوں میں عوام آپ کو ’’بابا‘‘ کے لقب سے یاد کرتے تھے۔
انہوں نے ترکی کے دوسرے صدر عصمت انونو کے بعد سب سے طویل عرصہ ملک پرحکومت کی ہے۔
