کراچی: گیارہ اور بارہ ربیع الاول کو کراچی سمیت صوبے کے دس اضلاع میں ڈبل سواری پر پابندی عائد کردی گئی ہے، جبکہ بارہ ربیع الاول کو وفاق سے کراچی میں موبائل فون سروس معطل رکھنے کی سفارش کی گئی ہے ۔
سیکریٹری داخلہ سندھ ڈاکٹر نیاز عباسی کے مطابق کراچی کے چھ اضلاع ، سکھر، جامشورو، خیرپور، اورحیدرآباد میں ڈبل سواری پر پابندی ہوگی، جس کا نوٹی فکیشن جاری کردیا گیا ہے، جبکہ ان اضلاع میں گیارہ اور بارہ ربیع الاول کو اسلحہ کی نمائش پر پابندی ہوگی اوراسلحہ لیکر چلنے کے خصوصی اجازت نامے منسوخ کردیے گئے ہیں تاہم ڈبل سواری پر پابندی عائد کردی گئی ہے اس میں خواتین، بزرگ ، بچے ، صحافی اور قانون نافذ کرنے والے اداروں کے اہلکار مستثنیٰ ہوں گے ۔
دوسری جانب محکمہ داخلہ سندھ نے وفاقی وزارت داخلہ کو ایک خط لکھا ہے کہ جس میں سفارش کی گئی کہ کراچی میں بارہ ربیع الاول کو موبائل فون سروس معطل کی جائے اور اس سلسلے میں انٹیلی جنس ذرائع کی جانب سے سیکیورٹی خدشات کا حوالہ دیا گیا ہے، موبائل فون سروس معطل رکھنے کی سفارش علی الصبح سے را ت گئے تک کیلئے کی گئی ہے ۔
