جنوبی کیرولینا :امریکی ریاست جنوبی کیرولینا میں چرچ میں نو افراد کے قتل میں ملوث قاتل کو گرفتار کرلیا ہے، ملزم ڈائلین روف نے فائرنگ سے قبل کہا کہ وہ یہاں سیاہ فام افراد کو قتل کرنے آیا ہے۔
ریاست جنوبی کیرولینا میں سیاہ فام کمیونٹی کے چرچ کی بیسمنٹ میں موجود اکیس سالہ لڑکے ڈائلین روف نے اس وقت فائرنگ شروع کر دی، جب وہاں بائبل کی تعلیمات پر گفتگو کی جارہی تھی۔
فائرنگ قبل کرنے سے قبل سفید فام نوجوان نے اعلان کیا کہ وہ یہاں صرف سیاہ فام افراد کو قتل کرنے آیا ہے، نو افراد کو قتل کرنے کے بعد ایک عورت کو اس نے یہ کہہ کر چھوڑ دیا کہ وہ باقی لوگوں کو بتا سکے کہ اس چرچ میں کیا ہوا۔
فائرنگ میں ملوث نوجوان کو شمالی کیرولینا میں ایک ٹریفک لائٹ پر گرفتار کیا گیا جبکہ اس سے ایک گن بھی بر آمد کی گئی۔ تحقیقات سے معلوم ہوا کہ کچھ عرصے قبل اکیسویں سالگرہ پر اسے اپنے والد کی جانب سے ایک گن تحفے کے طور پر دی گئی، جسے اس نے اس کاروائی میں بھی استعمال کیا۔
فائرنگ کے واقعے میں چھ خواتین جبکہ تین دیگر افراد کو قتل کیا گیا، قتل کئے جانے والوں میں ایک سابق سینیٹر بھی شامل ہے۔ جنہوں نے گزشتہ دنوں ہی ہیلری کلنٹن کی صدارتی مہم کے سلسلے میں ایک تقریب کا انعقاد کیا تھا۔
تحقیقاتی اداروں نے اس معاملے کی نفرت پر مبنی واقعہ کے طور پر مزید تحقیقات شروع کر دی ہیں جبکہ چارلیسٹن کے رہائشیوں نے چرچ میں جاکر جاں بحق افراد کی یاد میں وجل کا انعقاد بھی کیا۔
