جھنگ : دریائے چناب پر تریموں بیراج میں پانی کی سطح میں مسلسل اضافہ ہورہا ہے اور بیراج کو بچانے کے لیے بند توڑنے کا فیصلہ کرلیا گیا ہے۔
سیلاب کی صورت حال کے پیشِ نظر اٹھارہ ہزاری بند کو توڑنے کیلئے بارود نصب کردیا گیا ہے تاہم بند توڑنے کے درست وقت کا تعین کیا جارہا ہے۔
تریموں بیراج پر پانی کی سطح ساڑھے تین لاکھ کیوسک تک جا پہنچی ہے، پانی کے بہاؤ میں مسلسل اضافے اور بند نہ توڑنے کے باعث شہری علاقوں کو شدید خطرات لاحق ہیں، اونچے درجے کے سیلابی ریلا کے باعث جھنگ کے علاقے پکے والا کے قریب موجود ریلوے ٹریک بھی بہہ گیا۔
سیلابی صورت حال سے نمٹنے کے لیے اٹھارہ ہزاری بند کی سیکورٹی کو فوج کے حوالے کردیا گیا ہے، تریموں بیراج پر دریائے چناب کا آٹھ لاکھ کیوسک اور دریائے جہلم کا چار لاکھ کیوسک سے زائد کا ریلا گزرے گا۔
محکمہ انہار پنجاب کے مطابق تریموں بیراج کی زیادہ سے زیادہ پانی گزرنے کی صلاحیت چھ لاکھ پینتالیس ہزار کیوسک ہے لیکن ریت کی صفائی نہ ہونے کی وجہ سے یہ گنجائش کم ہو کر چار لاکھ کیوسک رہ گئی ہے، جہاں سے سات لاکھ کیوسک پانی گزرنے کا خدشہ ہے۔
سیلابی ریلہ تریموں بیراج کی قوت برداشت کا آج امتحان لے گا، اٹھارہ ہزاری کا بند نہ توڑنے کے باعث اب تک کئی علاقے پانی کی نذر ہوگئے ہیں، جن میں موضع چیلا ، رجانہ ، پیر کوٹ اور مسن شامل ہیں۔
