اسلام آباد: پی ٹی آئی اور حکومت کی ابتدائی بات چیت ہفتے کے بجائے اتوار کو ہوگی۔ مذاکرات کاباقاعدہ آغازمنگل سےہوگا۔ پی ٹی آئی کی مذاکراتی ٹیم میں جہانگیر ترین کو بھی شامل کر لیا گیا ہے۔
حکومت اور تحریک انصاف کے درمیان آج ہونے والے مذاکرات باقاعدہ طور پر منگل کو شروع ہوں گے، جمعے کو حکومت کی جانب سےتحریک انصاف سے رابطہ کر کے بات چیت ہفتہ کے بجائے اتوار کو کرنے کی درخواست کی گئی تھی، جس پر بتایا گیا کہ پیر کو پی ٹی آئی نے لاہور میں احتجاج کی کال دے رکھی ہےاور شاہ محمود قریشی مصروفیات کے باعث اتوار کو بات چیت کیلئے دستیاب نہیں ہوں گے،اس لئے مذاکرات اتوار کے بجائے منگل کو شرو ع کئے جاسکتے ہیں۔
تحریک انصاف کےجواب کے بعد فریقین ابتدائی بات چیت اتوار کے روز کر نے کیلئے رضا مند ہو گئے ہیں، جس میں حکومت کی جانب سے وزیر خزانہ اسحٰق ڈار اور احسن اقبال پی ٹی آئی کے اسد عمر سے ملاقات کریں گے۔
منگل کو شاہ محمو د قریشی کی موجودگی میں باقاعدہ بات چیت کاآغاز ہو گا۔ تحریک انصاف کے ترجمان کے مطابق تحریک انصاف کی مذاکراتی ٹیم میں جہانگیر ترین کا اضافہ کیا گیا ہے، جو شاہ محمود قریشی اور اسد عمر کے ساتھ حکومتی نمائندوں سے مذاکرات کریں گے۔
