حیدرآباد: عمران خان نے جوڈیشل کمیشن کی تشکیل پرقوم کومبارک باد پیش کرتے ہوئے کہا ہے کہ رواں سال الیکشن کا سال ہے ۔
پی ٹی آئی چئیرمین عمران خان کاحیدرآبادایئرپورٹ پرکارکنوں نے شانداراستقبال کیا، پی ٹی آئی کےجھنڈوں اورٹوپیوں سے ایئرپورٹ کااحاطہ رنگین ہوگیا،جوشیلے کارکنوں نےکپتان کی آمدکی خوشی میں خوُب رقص کیا، جوشیلے نوجوان جسم پرپارٹی پرچم لپیٹے ناچتے گاتے رہے۔
اس موقع پر چیئرمین تحریک انصاف کا میڈیا سے گفتگو میں کہنا تھا کہ جوڈیشل کمیشن کی اطلاع اے آر وائی نیوز نے دی، جبکہ جوڈیشل کمیشن کی تشکیل پرقوم کومبارک باد پیش کرتا ہوں ۔
عمران خان کا کہنا تھا کہ اسمبلی میں لانے کیلئے ہماری منتیں کی گئیں،جب گئے تو سب خلاف ہوگئے انہوں نے کہا کہ اسمبلی میں سب پی ٹی آئی کے خلاف اکھٹے ہوجاتے ہیں ۔
انہوں نے کہا کہ تحریک انصاف میدان میں نہ آتی تو بندربانٹ چلتی رہتی اور سٹیٹس کو باریاں لیتا رہتا، عمران خان نے کہا کہ جب تک میرٹ کو نظرانداز کیا جاتا رہے گا، لوگوں کو ان کا حق نہیں ملے گا۔ پچھلے 18 سال کے دوران میں نے صرف ایک سفارش کی اور وہ بھی اس شخص کی جس نے شوکت خانم ہسپتال کو بھاری چندہ دیا۔
انہوں نے کہا کہ اب سندھ کو زیادہ وقت دینا ہے کیونکہ سندھ کو صحیح معنوں میں تبدیلی کی سب سے زیادہ ضرورت ہے۔ سندھ میں صحیح معنوں میں بلدیاتی الیکشن ہونے تک تبدیلی نہیں آئے گی۔
