لندن: ہمیشہ سے ہی یہ بات آپ نے سنی ہوگی کہ دودھ ایک مکمل غذا ہے اور یہ دانتوں اور ہڈیوں کو مضبوط بناتا ہے لیکن حال ہی میں کی گئی سویڈش تحقیق میں حیران کن حقائق سامنے آئے ہیں، جس کے مطابق دودھ کا زیادہ استعمال کرنے والے لوگ جوانی میں ہی موت کا شکار ہوگئے جبکہ خواتین کی ہڈیاں کمزور ہوگئیں۔
تحقیق کار ان نتائج پر حیران ہیں اور انہوں نے کہا ہے کہ آخری نتیجہ نکالنے سے پہلے ضروری ہے کہ اس امر پر مزید تحقیق کی جائے، ماہرین نے اس کی وجہ یہ بتائی ہے کہ دودھ میں ایک طرح کی شوگر ڈی گلیکٹوزہوتا ہے اور جانوروں پر تجربات میں یہ بات سامنے آئی ہے یہ عمر بڑھنے کے عمل کو تیز کرتے ہوئے زندگی کا دورانیہ مختصر کردیتا ہے۔
سویڈش تحقیقاتی ٹیم نے 61,000خواتین جن کی عمر 39-74کے درمیان تھی کا ڈیٹا لیا اور بیس سال تک اس کا جائزہ لیا جبکہ 45,000 مرد جن کی عمر 45-79کے درمیان تھی انکا ڈیٹا لے کر اسکا گیارہ سال تک کا جائزہ لیا گیا۔ جن لوگوں کا ڈیٹا لیا گیا انہوں نے اپنی زندگی کی تفصیلات بشمول وزن، سگریٹ نوشی، ورزش اور دیگر معلومات بھی فراہم کیں تاکہ تحقیق کو بہتر بنایا جا سکے۔
ایک تحقیق کار کا موازنہ کرتے ہوئے کہنا تھا کہ وہ خواتین جو دن میں تین یا اس سے زیادہ دودھ کا گلاس اور وہ خواتین جو ایک گلاس یا اس سے کم دودھ پیتی رہی ہیں میں موت کا شکار ہونے کے امکانات 90فیصد، چوکلے کے فریکچر کا چانس 60فی صد ہے۔
اس کا کہنا تھا کہ یہ بات سامنے آئی ہے کہ زیادہ دودھ خواتین کی ہڈیوں کے لئے نقصان دہ ہو سکتا ہے۔
