کراچی : وفاقی وزیرِداخلہ چوہدری نثار کا کہنا ہے کہ سانحہ کراچی میں ملوث دہشت گردوں سےمتعلق اہم معلومات ملی ہیں۔حالیہ کارروائی میں ملوث دہشتگردوں کوجلد کٹہرے میں لائیں گے۔
سینتالیس بے گناہ اسماعیلیوں کےقتل عام کے چھ روز بعد وفاقی وزیر داخلہ چوہدری نثار کراچی پہنچ ہی گئے، شہر میں انٹری دی تو سب سے پہلے رینجرز ہیڈ کواٹر پہنچے اور ڈی جی رینجرز سے ملاقات کی، میجر جنرل بلال اکبر نےوفاقی وزیر داخلہ کو سانحہ کراچی کی تحقیقات سمیت دیگر اہم مقدمات پر بریفنگ دی۔
چوہدری نثار نے رینجرز کےکردار کوسراہتے ہوئے کہا کہ رینجرز کے ایکشن سے ٹارگٹ کلنگ میں نمایاں کمی آئی ہے، اجلاس میں ڈی جی رینجرز میجر جنرل بلال اکبر، اور دیگر اعلیٰ رینجرز افسران ، آئی جی سندھ اور ایڈیشنل آئی جی بھی شریک تھے۔
ملاقات کے بعد چوہدری نثار نے یادگار شہداء پرحاضری دی اور فاتحہ پڑھی۔
سندھ رینجرز کے سالاراعلیٰ سے ملنے کے بعد چوہدری نثار نے سائیں قائم علی شاہ سے ملاقات کی، جس میں امن وامان اور آپریشن کے حوالے سے تبادلہ خیال کیا گیا، ملاقات میں ایڈیشنل آئی جی اوردیگراعلیٰ حکام بھی موجود تھے۔
وفاقی وزیرِداخلہ نے کہا کہ سانحہ کراچی میں ملوث دہشت گردوں کے بارے میں اہم معلومات ملی ہیں ۔ واقعہ اندرونی اور بیرونی ہاتھ جو بھی ملوث ہوا تو انہیں انجام تک پہنچائیں گے۔.
وزیر داخلہ نے گورنر سندھ ڈاکٹرعشرت العباد سےبھی ملاقات کی، جس میں کراچی آپریشن اور سانحہ صفورہ پر تفصیلی بات کی گئی، گورنر نے وفاقی وزیر داخلہ کو یقین دلایا کہ کراچی آپریشن کو کسی دباؤ میں آکر نہیں روکاجائے گا۔
وفاقی وزیرِداخلہ کا کہنا ہے کہ سانحہ کراچی میں ملوث دہشت گردوں سے متعلق اہم معلومات ملی ہیں، حالیہ کارروائی میں ملوث دہشتگردوں کو جلد کٹہرے میں لائیں گے۔
