کراچی: سابق صدر پرویزمشرف اور فنکشنل لیگ کے سربراہ پیرصاحب پگارا نے نئے سیاسی اتحاد پر اتفاق کرلیا۔
آل پاکستان مسلم لیگ کے صدر پرویز مشرف مسلم لیگ ن کے سابق صدر غوث علی شاہ کے ہمراہ مسلم لیگ ف کے سربراہ پیر پگاڑا کی رہائش گاہ پر پہنچ گئے۔
ذرائع کے مطابق تین گھنٹے تک جاری رہنے والی ملاقات میں ایک نئے ملک گیر سیاسی اتحاد بنانے کے حوالے سے بات ہوئی ہے، پیر پگارا اور پرویز مشرف نے اس بات پر اتفاق کیا ہے کہ تمام مسلم لیگی دھڑوں سے رابطے کئے جائیں گے اور دیگر سیاسی جماعتوں سے بھی نئے سیاسی اتحاد کےلئے رابطے کئے جائیں گے۔
ذرائع کے مطابق سابق وزیراعلی سندھ سید غوث علی شاہ کو رابطوں کے لئے اہم ذمہ داریاں دی گئی ہیں اس دوران سندھ کے دو سابق وزرائے اعلی ارباب غلام رحیم اور لیاقت جتوئی سے بھی رابطے کئے گئے۔
اس ملاقات کے بارے میں مسلم لیگ ف کے ترجمان کامران ٹیسوری نے اے آروائی نیوز کو بتایاکہ پرویز مشرف اور غوث علی شاہ پیر پگارا کےکھانے کی دعوت پر تشریف لائےتھے اور اس دوران سیاسی صورتحال پر تبادلہ خیال ہوا۔
واضح رہے کہ دو ہفتے قبل پیپلز پارٹی کے رہنما مخدوم امین فہیم اور پیر پگارا نے مشترکہ طورپر پرویز مشرف سے ملاقات کی تھی اس کے بعد ان کے سیاسی جماعتوں سے رابطے ہوئےتھے اور وسیع تر سیاسی اتحاد بنانے کےلئےکوششیں جاری ہیں۔
