ماحولیاتی سائنسدان ایک عرصے سے خبردار کر رہے تھے کہ زمین کے اوسط درجہ حرارت میں 2 ڈگری سیلسیئس کا اضافہ بڑی تباہی کا پیش خیمہ ثابت ہوسکتا ہے اور تشویشناک بات یہ ہے کہ سال 2014ء کو نہ صرف تاریخ کا گرم ترین سال قرار دیا جا رہا ہے بلکہ اس سال میں زمین کے اوسط درجہ حرارت میں اضافے نے 2 ڈگری کی حد کو بھی چھو لیا ہے۔
عالمی درجہ حرارت کو سائنسی طور پر ریکارڈ کرنے کا عمل باقاعدہ طور پر 1880ء میں شروع کیا گیا اور تقریباً ڈیڑھ صدی کے عرصہ میں 2014ء کو گرم ترین سال قرار دیا جا رہا ہے۔
سمندری اور ماحولیاتی تحقیق کرنے والے امریکی ادارے کے مطابق بیسویں صدی کا اوسط درجہ حرارت برائے ماہ اکتوبر 9.3 ڈگری سیلسیس ریکارڈ کیا گیا تھا جبکہ اس سال یہ 11.3 ڈگری تک پہنچ گیا۔
سائنسدانوں کا کہناہے کہ 2 ڈگری اضافہ سے قطبین پر برف کے پگھلاﺅ میں خطرناک حد تک اضافہ ہوگا، سمندروں کا لیول اونچا ہو جائے گا، زمین زیرِآب آجائے گی اور تباہ کن سمندری اور زمینی طوفان آئیں گے۔
