نواب شاہ: وزیرِاعلیٰ سندھ قائم علی شاہ کا کہنا ہے کہ سانحہ صفورہ کے چار ملزمان کو گرفتار کرلیا گیاہے۔
تفصیلات کےمطابق سندھ کے وزیراعلیٰ قائم علی شاہ نے میڈیا سے گفتگو کرتے ہوئے سانحہ صفورہ کے چار ملزمان کو گرفتار کرنے کا انکشاف کیا ہے۔
گزشتہ ہفتے 13 مئی 2015 کو کراچی کے علاقے صفورہ گوٹھ میں سفاک دہشت گردوں نے اسماعیلی کمیونٹی کی بس کو روک کر اس میں سوار افراد کو گولیوں سے بھون دیا تھا جس کے نتیجےمیں 47 افراد جاں بحق جبکہ متعدد زخمی ہوئے تھے۔
آج صبح صوبائی اسمبلی میں خطاب کرتے ہوئے وزیر اعلیٰ کا کہنا تھا کہ عینی شاہدین کی مدد سے ملزمان کے بے حد نزدیک پہنچ گئے ہیں اور جلد گرفتاریاں ہوں گی۔
وزیر اعلیٰ نے یہ بھی کہا کہ سندھ پولیس اور حکومت کی مشترکہ کوششوں سے کراچی میں بھتہ خوری اور ٹارگٹ کلنگ جیسے واقعات میں 65 فیصد کمی آگئی ہے۔
ان کا کہنا تھا کہ گرفتار مجرمان سے تفتیش جاری ہے اورجلد ہی اس تفتیش کی بنا پرمزید گرفتاریاں بھی ہوں گی۔
