تہران: ایران کے روحانی لیڈر آیت اللہ خامنہ ای نے یمن میں شیعہ قبائل کے خلاف جاری سعودیہ اور اس کے اتحادی ممالک کے حملوں کو مجرمانہ فعل قراردے دیا۔
ایرانی لیڈر نے اپنی ویب سائٹ پر سعودی حکومت کے نام جاری کردہ پیغام میں کہا ہے کہ ’’ خطے میں اس قسم کی حرکت برداشت نہیں کی جائے گی اورہم خبردار کرتے ہیں یمن میں مجرمانہ کاروائیاں فی الفور روکی جائیں‘‘۔
انہوں نے کہا کہ ’’ سعودی حکومت اپنے تباہ کن جرائم جلد از جلد بند کرے‘‘۔
واضح رہے کہ سعودیہ کی سربراہی میں عرب ممالک اورامریکہ نے یمن میں 26 مارچ سے فضائی حملوں کا سلسلہ شروع کیا ہوا ہے۔
یمن کے باغیوں نے ایک بڑے حصے پر قبضہ کررکھا ہے جس میں دارالحکومت صنعاء بھی شامل ہے اور حوثی قبائل کی ان کاروائیوں کے نتیجے میں یمنی صدر نے بھاگ کر عدن میں پناہ لے رکھی ہے۔
خامنہ ای نے مزید کہا کہ ’’سعودی حکومت یمن میں جو کچھ کررہی ہے وہ ایسا ہی ہے جیسا صیہونی غزہ میں کرتے ہیں‘‘۔
انہوں نے یمن میں بچوں کی ہلاکت، گھروں کی تباہی ، انفرا اسٹرکچر اور دولت کے نقصان پر تبصرہ کرتے ہوئے کہا کہ ’’یہ قتلِ عام ہے، نسل کشی ہےاورعالمی سطح پر قابلِ تعزیرہے‘‘۔