ریاض: سعودی سفارتخانے کا کہنا ہے کہ سعودی عرب مدارس کی مالی امداد کے زریعے انتہا پسندوں کو فنڈنگ نہیں کر رہا ، اس حوالے سے میڈیا کے ایک مخصوص حصے میں نشر ہونے والی خبریں غلط بپروپگنڈے پر مبنی ہیں اور ان کے زریعے سعودی عرب کے حوالے سے منفی تاثر دیا جارہا ہے۔
سعودی سفارتخانے کی جانب سے جاری کردہ اعلامیہ میں کہا گیا ہے کہ سعودی عرب حکومت پاکستان کے ساتھ انتہا پسندی کے خاتمے کیلئے اقدامات میں معاونت کر رہا ہے اور اس بات کا خصوصی خیال رکھا جاتا ہے کہ انسانی بنیادوں پر دی جانے والی امداد انتہا پسندوں کے ہاتھ نہ لگے۔
اعلامیہ میں مزید کہا گیا ہے کہ جب بھی کوئی مدرسہ ، مسجد یا خیراتی ادارہ سعودی حکومت سے مالی معاونت کیلئے کہتا ہے تو اس درخواست کا جائزہ لینے کیلئے معاملہ وزارتِ خارجہ کے زریعے حکومت پاکستان کو بجھوایا جاتا ہے۔
پاکستانی وزارتِ خارجہ کی جانب سے تحریری جواب موصول ہونے پر کہ یہ امداد انسانی فلاحی منصوبے کیلئے ہے، درخواست گزار کو مالی معاونت فراہم کی جاتی ہے ۔
