اسلام آباد: سپریم کورٹ میں وزیرِاعظم نااہلی کیس میں تحریکِ انصاف کے وکیل نے سماعت کیلئے لارجر بینچ تشکیل دینے کی استدعا کی ہے، جسٹس جواد ایس خواجہ کا کہنا ہے کہ یہ اختیار چیف جسٹس کا ہے اس کے لئے درخواست دے دیں۔
وزیرِاعظم نواز شریف کی نااہلی سے متعلق تحریکِ انصاف کی درخواست کی سماعت سپریم کورٹ کے تین رکنی بینچ نے کی، پی ٹی آئی کے وکیل گوہر نواز نے کہا کہ وزیرِاعظم نے پارلیمنٹ کے مشترکہ اجلاس میں کہا تھا کہ انھوں نے فوج کو کردار ادا کرنے کیلئے نہیں کہا، تحریکِ انصاف کے چیئرمین عمران اور ڈاکٹر طاہرالقادری آرمی چیف سے ملنا چاہتے تھے لیکن آئی ایس پی آر نے وضاحت کی کہ فوج کو سہولت کار کا کردار ادا کر نے کیلئے حکومت نےکہا تھا ۔
گوہر نواز کا کہنا تھا کہ وزیرِاعظم غلط بیانی کرکے اسمبلی کی رکنیت کیلئے نااہل ہوگئے ہیں، عدالت انہیں وزارتِ اعظمی کے عہدے کیلئے نااہل قرار دے ہیں۔
ایڈوکیٹ عرفان قادر نے کہا کہ عدالت کی جانب سے اراکین پارلیمنٹ کو نااہل قرار دیئے جانے کی مثالیں پہلے سے موجود ہیں۔ فریقین کے دلائل جاری تھے کہ سماعت دو اکتوبر تک ملتوی کردی گئی ہے۔
