لاہور: سابق گورنر پنجاب چودھری محمد سرور نے کہا ہے کہ سیاستدانوں اور بیورو کریٹس کا 2 ارب ڈالر سرمایہ بیرون ملک سے واپس لائیں گے، خیبر پختونخواہ میں بلدیاتی انتخابات مئی جون میں کرائے جائیں گے، پنجاب حکومت بھی فی الفور بلدیاتی انتخابات کروائے۔
تحریک انصاف لاہور کے استقبالیئے سے خطاب کرتے ہوئے سابق گورنر پنجاب چودھری محمد سرور کا کہنا تھا کہ سیاستدانوں اور بیوروکریٹس کے اربوں ڈالر بیرون ملک پڑے ہیں، جنہیں پی ٹی آئی واپس لائے گی۔
انہوں نے کہا کہ خیبر پختونخواہ میں بلدیاتی انتخابات مئی جون میں کروا دیئے جائیں گے، پنجاب حکومت بھی فی الفور بلدیاتی انتخابات کرائے۔
انہوں نے دعوٰی کیا کہ پنجاب میں آئندہ بلدیاتی انتخابات تحریک انصاف جیتے گی، جبکہ آئندہ عام انتخابات میں بھی پاکستان بھر میں تحریک انصاف کی حکومت قائم ہو گی۔
چودھری سرور نے کہا کہ وہ کل شیخوپورہ میں پہلا جلسہ عام کریں گے، 5 مارچ کو میر پور میں عوامی قوت کا مظاہرہ کیا جائے گا۔ انہوں نے کہا کہ وہ سیاست کو تجارت کی بجائے عبادت بنائیں گے۔
