نیویارک: انفارمیشن سیکیورٹی کمپنیوں نے خبردار کیا کہ آئی فون صارفین کو بڑا خطرہ ہے کیونکہ ایک خطرناک وائرس آئی ایس اوز 7 اور آئی ایس اوز 8 آپریٹنگ سسٹم استعمال کرنے والے موبائل فونز پر وائرس حملہ آور ہوچکا ہے۔
اینٹی وائرس کمپنی کا کہنا ہے کہ یہ وائرس صارفین کو بظاہر ان کے دوستوں، جاننے والوں یا ان کے کاروباری اداروں کی طرف سے بھیجا جاتا ہے، تاکہ وہ اسے ضرور اوپن کریں اور اس وائرس کا نشانہ بنیں۔
اینٹی وائرس کمپنی کا خیال ہے کہ یہ وائرس روسی ہیکروں نے تیار کیا ہے۔
ایکس ایجنٹ نامی وائرس مائیکرو فون کو ازخود آن کرکے صارف کی آواز ریکارڈ کرسکتا ہے اور اسی طرح کیمرہ آن کرکے تصاویر بھی لے سکتا ہے۔ اس کے بعد چوری شدہ معلومات نامعلوم سرورز کو بھیج دی جاتی ہیں۔
یہ وائرس موبائل فون میں گھس کر ٹیکسٹ میسج، کنٹیکٹ لسٹ، تصاویر، لوکیشن ڈیٹا اور فون پر استعمال ہونے والی ایپس کی معلومات چوری کرتا ہے اور فون پر استعمال ہونے والے کسی بھی سافٹ ویئر کو متاثر کرسکتا ہے۔
خیال رہے کہ اس سے قبل اس وائرس کو حکومتوں، افواج اور میڈیا کے نمایاں افراد کی جاسوسی کے لئے استعمال کیا جاتا رہا ہے لیکن اب یہ عام صارفین کے موبائل فونز پر حملہ آور ہوکر ان کی قیمتی معلومات چوری کررہا ہے۔
