شکار پور: امام بارگاہ دھماکے کے شہیدوں کی اجتماعی نماز جنازہ ادا کر دی گئی ہے۔
شکار پور کی امام بارگاہ میں شہید افراد کی نماز جنازہ میں ہزاروں افراد نے شرکت کی ، لواحقین کاندھوں پر زندگی بھر کےغم کا بوجھ اٹھائے جنازہ گاہ پہنچے، اجتماعی نماز جنازہ کے موقع پر سیکیورٹی کے سخت انتظامات کئے گئے تھے ۔
نمازِ جنازہ میں مذہبی و سیاسی جماعتوں کے لوگ بھی شریک ہوئے، رہنماؤں نے اپنے خطاب میں دہشتگردوں کو سخت سزا دینے کا مطالبہ کیا۔
اس موقع پر رقت آمیز مناظر دیکھنے میں آئے، لواحقین غم سے نڈھال اپنے پیاروں کی یاد میں روتے رہے اور سینہ کوبی بھی کرتے رہے۔
اس سے قبل سانحہ شکارپور میں جاں بحق دو افراد کی نماز جنازہ اسٹیشن روڈ پر اد کردی گئی۔
شکار پور کے امام بارگاہ حملے میں جاں بحق ہونیوالے ایک ہی خاندان کے دو افراد ڈاکٹر جاوید شاہ اور علی رضا شاہ کی نماز جنازہ اسٹیشن روڈ پر ادا کردی گئی، نمازِ جنازہ میں رشتہ داروں سمیت اہل علاقہ کی بڑی تعداد شریک تھی، اس موقع پر رقت آمیز مناظر بھی دیکھنے میں آئے ۔
نمازہ جنازہ کی ادائیگی کے بعد مشتعل افراد نے احتجاج کیا، احتجاجی مظاہرین نے حکومت کے خلاف نعرے بازی کی اور قاتلوں کی فی الفور گرفتاری کا مطالبہ کیا ہے۔
یاد رہے گزشتہ روز شکار پور میں مسجد و امام بارگاہ میں نماز جمعہ کے دوران دھماکے سے اکسٹھ افراد شہید جبکہ متعدد زخمی ہوگئے تھے، دھماکا اس وقت ہوا جب مسجد نمازیوں سے بھری ہوئی تھی، دھماکے میں کئی افراد موقع پر ہی جاں بحق ہوگئے تھے۔
