ملک بھر کی طرح کراچی میں ایام عزا کے آخری چپ تعزیے جلوس نشتر پارک سے صبح سات بجے برآمد ہوا، جلوس ہرسال آٹھ ربیع الاول کو نشتر پارک سے برآمد ہوتا ہے۔
جلوس مقررہ روایتی راستوں ایم اے جناح روڈ، سی بریز، صدر، ریگل، تبت سینٹر، جامع کلاتھ، بولٹن مارکیٹ، حسینیہ ایرانیاں کھارادر سے ہوتا ہوا نور باغ مسافر خانے پراختتام پذیر ہوگا۔
جلوس میں شامل عزادار ان شہدائے کربلا نوحہ خوانی اور سینہ کوبی کر رہے ہیں، اس موقع پر سیکیورٹی کے سخت حفاظتی انتظامات کیے گئے ہیں، جلوس کے راستے بم ڈسپوزل اسکواڈ اور سراغ رساں کتوں کے ذریعے کلیئر قرار دیے جا چکے ہیں۔
جلوس کے مقررہ راستے نمائش سے ٹاور تک ایم اے جناح روڈ کے تمام لنک روڈز بند کر دیئے گئے ہیں، اس موقع پر پولیس اور رینجرز کی بھاری نفری بھی تعینات کی گئی ہے، جلوس کے راستوں پر بلند عمارتوں پر ماہر نشانہ باز تعینات کیے گئے ہیں۔
ڈائریکٹرجنرل رینجرز میجر جنرل رضوان اختر کی سربراہی میں گذشتہ روز رینجرز ہیڈ کوارٹرز میں چپ تعزیے کی سیکیورٹی کے حوالے سے فول پروف انتظامات کو حتمی شکل دی گئی، جلوس کے روٹس کی سراغ رساں کتوں کے ذریعے چیکنگ کرائی گئی ہے جبکہ جلوس کی فضائی نگرانی بھی کی جا رہی ہے۔
