اسلام آباد : صدر مملکت ممنون حسین نے عام انتخابات دو ہزار تیرہ کے عام انتخابات میں دھاندلی کی تحقیقات کے لئے عدالتی کمیشن کے قیام کا آرڈیننس جاری کردیا ہے۔
آرڈیننس کا اطلاق پورے پاکستان پر ہوگا اور وہ فوری طور پر نافذالعمل ہوگا۔آرڈیننس کے مطابق وفاقی حکومت جوڈیشل کمیشن کی تشکیل کے لئے آرڈیننس کے اجراء کے تین دن کے اندر چیف جسٹس سپریم کورٹ سے استدعا کرے گی، جس کے نتیجے میں چیف جسٹس جوڈیشل کمیشن کے لیے تین ججوں اور چیرمین کا نام تجویز کریں گے۔
اگر چیف جسٹس خود کمیشن کا حصہ ہوئے تو وہ چیئرمین کے فرائض سرانجام دیں گے۔کمیشن ان نکات کا جائزہ لے گا کہ کیا عام انتخابات دو ہزار تیرہ کا انعقاد غیرجانبدارانہ، دیانتدارانہ ، شفاف اور قانون کے مطابق تھا؟
کیا اس انتخابی عمل میں منظم اور سوچی سمجھی کا دھاندلی کا اہتمام کیا گیا؟ کیا دو ہزار تیرہ کا انتخاب مجموعی طور پر عوامی مینڈیٹ کا عکاس ہے یا نہیں؟ان نکات کی تحقیقات کے لیے کمیشن کو فوجداری عدالت کے اختیارات حاصل ہوں گے اور وہ ضابطہ فوجداری اور دیوانی کے قوانین کے مطابق کا م کرے گا۔
کمیشن کسی بھی شخص کو معلومات، دستاویزات، نکات یا مواد فراہم کرنے کا حکم دے سکتا ہے جو تحقیقات کے لیے ضروری ہوسکتی ہے۔کمیشن کو کسی کو سزا دینے کے وہی اختیارات ہوں گے جو سپریم کورٹ کو حاصل ہورتے ہیں۔
جو شخص کمیشن کی کارروائی کا رخ موڑنے کی کوشش کرے یا اس میں روکاٹ پیدا کرے یا کمیشن کی ہدایات کے خلاف عمل کرے یا کمیشن یا اس کے کسی رکن کو بدنام کرے یا ان کے خلاف کو ئی ایسی بات کرے جس سے نفرت ، تضحیک یا توہین کا اظہار ہو یا کوئی ایسا عمل کرے جس سے کمیشن کسی کارروائی متاثر ہو یا کوئی ایسا اقدام کرے جس سے توہین عدالت ہوتی ہو تو کمیشن سپریم کورٹ کی طرح توہین عدالت کی سزا سنا سکتا ہے ۔
تاہم کمیشن کی رپورٹ پر درست جو تبصرے جو نیک نیتی سے عوامی دلچسپی کے لیے کیے جائیں گے ، توہین کمیشن کے زمرے میں نہیں آئیں گے۔
