لاہور: لانگ مارچ اور دھرنے دینے پر ڈاکٹر طاہرالقادری اورعمران خان کے خلاف توہین عدالت کیس کی سماعت لاہورہائیکورٹ نے نو دسمبر تک ملتوی کردی۔
لاہور ہائیکورٹ کے جسٹس خالد محمود خان کی سربراہی میں تین رکنی بنچ نے کیس کی سماعت کی ۔درخواست گزاروں نے کہا کہ عدالت نے لانگ مارچ اور دھرنے روکنے کے احکامات جاری کیے مگر اس کے باوجود عوامی تحریک اورتحریک انصاف نے لانگ مارچ اوردھرنے بھی دیئے جو توہین عدالت ہے۔
لہٰذا عدالت عمران خان اور طاہرالقادری کے خلاف کارروائی کرے۔ اس کے علاوہ اشتعال انگیز تقاریر پر عمران خان کے خلاف بغاوت کی دفعات کے تحت مقدمہ درج کیا جائے۔
درخواست گزاروں نے استدعا کی کہ ملکی املاک پر حملے اور اشتعال انگیز تقاریر پر پاکستان عوامی تحریک پر پابندی عائد کی جائے۔ تحریک انصاف اور عوامی تحریک کے وکلاء مصروفیت کے باعث پیش نہ ہوئے جس پر عدالت نےکیس کی سماعت نو دسمبر تک ملتوی کردی۔
