لاہور: پاکستان عوامی تحریک کے قائد ڈاکٹر طاہر القادری کی علاج کی غرض سے کل صبح امریکا کیلئے روانہ ہو جائیں گے۔ ڈاکٹروں نے طاہر القادری کو ملک سے باہر جا کر فوری علاج کروانے کا مشورہ دیدیا ہے۔
تفصیلات کے مطابق پاکستان عوامی تحریک کے سربراہ ڈاکٹر طاہر القادری علاج کے غرض سے آئندہ چوبیس گھنٹے میں امریکا روانہ ہو جائیں گے۔ ڈاکٹر طاہر القادری کا امریکی معالج پر مشتمل پانچ رکنی ڈاکٹرز کے پینل نے آج معائنہ کیا اور انہیں مشورہ دیا کہ وہ جلد از جلد علاج شروع کرائیں، تاخیر کی صورت میں پیچیدگیاں بڑھ سکتی ہیں۔
میڈیا ایڈوائزر نے طبی معائنے کی تصدیق کرتے ہوئے بتایا کہ ایک ڈاکٹر امریکہ سے ہنگامی طور پر رات لاہور پہنچے۔ میڈیا ایڈوائزر کا کہنا تھا کہ علاج سے متعلق حتمی فیصلہ ڈاکٹرز کرینگے تاہم ڈاکٹروں نےانہیں بیرون ملک جا کرعلاج کا مشورہ دیدیا ہے۔
اس دوران انکی عیادت کیلئے مختلف سیاسی رہنمائوں کیجانب سے ملاقاتوں کا سلسلہ بھی جاری ہے۔ چیئرمین تحریک انصاف عمران خان نےعوامی تحریک کے قائد سےرابطہ کیا اور انکی خیریت دریافت کی۔
ادھرحکومت نے طاہر القادری کو علاج کیلئےخصوصی ایمبولینس طیارے میں بھجوانے کیلئے پیشکش کی ہے جس کا تاحال طاہر القادری اور انکے اہلِ خانہ نے کوئی جواب نہیں دیا ہے۔
