ڈیرہ بگٹی: جہموری وطن پارٹی کے سربراہ نوابزادہ طلال اکبر بگٹی کی نماز جنازہ آج ادا کی جائیگی، تدفین ڈیرہ بگٹی میں ہوگی۔
سابق گورنربلوچستان نواب اکبربگٹی کے صاحبزادے نوابزادہ طلال اکبر بگٹی کی نمازِ جنازہ آج ڈیرہ بگٹی میں ادا کی جائیگی اور انہیں ڈیرہ بگٹی میں نواب اکبر بگٹی کے پہلو میں سپرد خاک کیا جائیگا۔
شاہ زین بگٹی نے طلال اکبربگٹی کو خراج تحسین پیش کرتے ہوئے کہا ہے کہ بلوچستان کےمسائل اور سیاست سے متعلق طلال اکبر بگٹی کی خدمات کو فراموش نہیں کیا جاسکتا۔
اکبر بگٹی کی وفات کے بعد جمہوری وطن پارٹی کی قیادت سنبھالنے والے نوابزادہ طلال اکبر بگٹی گزشتہ روز مختصر علالت کے بعد کوئٹہ میں انتقال کر گئے تھے، جے ڈبلیو پی نے ان کے انتقال پر سات روزہ سوگ کا اعلان کیا ہے۔
نواب زادہ طلال اکبر بگٹی 17 مارچ 1952 کو بلوچستان کے علاقے ڈیرہ بگٹی میں پیدا ہوئے تھے آپ اپنے والد کی چوتھی اولاد تھے اور آپ سے بڑی دو بہنیں اور ایک بھائی سلیم ہیں۔
نواب زادہ طلال کے تین بیٹے شاہ زین بگٹی، گہرام بگٹی اور میرچاکار بگٹی ہیں۔
آپ نے اپنی تعلیم ایچی سن کالج اور پنجاب یونیورسٹی سے حاصل کی۔
نواب اکبرخان بگٹی نے 1993 کے انتخابات میں جمہوری وطن پارٹی کی بنیاد رکھی اور قومی اسمبلی کے رکن منتخب ہوئے۔
ان کی پارٹی 2002 کے انتخابات میں کوئی قابلِ ذکرکامیابی حاصل نہیں کرپائی تھی۔
اگست 2006 میں نواب اکبربگٹی کی ایک فوجی حملے میں ہلاکت کے بعد نواب زادہ طلال نے پارٹی کی باگ ڈور سنبھالی اور تادمِ مرگ پارٹی کے سربراہ رہے۔
