اسلام آباد: چیئرمین سینیٹ میاں رضا ربانی نے کہا ہے کہ پارلیمنٹ کی قرارداد قومی امنگوں کی عکاس ہے اور عرب امارت کے وزیر کا بیان سفارتی آداب کی خلاف ہے ۔
اسلام آباد میں سینیٹرز سیمینار سے خطاب اور میڈیا سے گفتگو میں رضا ربانی نے کہا کہ وہ پارلیمنٹ کو زیادہ ذمہ دار ادارہ بنانا چاہتے ہیں اور ایوان بالا میں وزراء اور اراکین کی حاضری یقینی بنانے کی کوشش کی جائے گی ۔
چیئرمین سینیٹ نے کہا کہ اس بات کی یقین دہانی وزیرِاعظم نے بھی کرائی ہے ۔
رضا ربانی کا کہنا تھا کہ کہ سینیٹ کے اجلاس کے دوران سیکرٹریٹ کا اسٹاف بھی گیلری میں موجود ہوگا اور ان کی حاضری چیک کی جائے گی۔
انہوں نے کہا کہ فوجی آمریت اور خاص طور پر پرویز مشرف کے غیر آئینی اقدامات افسوسناک تھے اور انہوں نے پارلیمنٹ کا تقدس پامال کیا ۔
رضا ربانی نے کہا کہ اب سینیٹ کا اجلاس وقت پر ہوگا اور اجلاس کی کاروائی کم از کم ڈیڑھ سے تین گھنٹے چلے گی، ایوان میں دو یا تین ممبرز ہوں تو بھی کاروائی چلائی جائے گی۔
سیمینار میں وسیم سجاد،مشاہد حسین سید ،طاہر حسین مشہدی اور دیگر نے بھی شرکت کی، انہوں نے سینیٹ کو مزید فعال بنانے کیلئے تجاویز بھی دیں۔
