اسلام آباد: عمران خان اور آصف زرداری کے درمیان ٹیلی فونک رابطہ ہوا جس میں سینیٹ انتخابات پر تبادلہ خیال کیا گیا۔
تحریک انصاف کے چیرمین عمران خان اور سابق صدر آصف زرداری کے درمیان ٹیلی فون پر رابطہ ہوا جس میں دونوں رہنماؤں کے درمیان سینیٹ انتخابات کے حوالے سے تفصیلی تبادلہ خیال کیا گیا۔
دوران گفتگو عمران خان کا کہنا تھا کہ ہارس ٹریڈنگ سیاستدانوں کے ماتھے پر سیاہ دھبہ ہے لہذا 22 ویں آئینی ترمیم نہ صرف سینیٹ انتخابات میں ہارس ٹریڈنگ روکنے میں مددگار ثابت ہوگی بلکہ مستحکم جمہوریت کے لئے بھی سنگ میل ثابت ہوگی۔
چیئرمین پاکستان تحریک انصاف کا کہنا تھا کہ پیپلز پارٹی کو چاہئے کہ وہ اچھے اقدامات پر حکومت کی حمایت کرے۔
اس موقع پر سابق صدر آصف زرداری کا کہنا تھا کہ پیپلز پارٹی نے ہمیشہ جمہوریت کے لئے قربانیاں دیں اور اس کے استحکام کے لئے کوشاں بھی ہے۔
دوسری جانب سابق صدر آصف زرداری نے جماعت اسلامی کے سربراہ سراج الحق کو فون کیا،دونوں رہنماؤں نے تحریک انصاف اور حکومت کے درمیان مذاکرات کامیاب بنانے پر بھی تبادلہ خیال کیا۔
