اسلام آباد: وفاقی وزیرِ اطلاعات پرویز رشید کا کہنا ہے کہ عمران خان ملک دشمنی پر اترے ہوئے ہیں وہ عالمی طاقتوں کے مقاصد کی تکمیل چاہتے ہیں۔
پرویز رشید نے تحریک ِ انصاف کے جلسے کے بعد اے آر وائی نیوز کو حکومتی مؤقف دیتے ہوئے کہا کہ عمران خان کا دعویٰ تھا کہ 10 لاکھ لوگ آئیں گے لیکن اصل صورتحال کا جائزہ میڈیا خود لے رہا ہے۔
ان کا کہنا تھا کہ عالمی طاقتیں 2015 میں پاکستان کو ایک ناکام ریاست قرار دینا چاہتی ہیں اور ہڑتالوں کی سیاست کر کے عمران خان اس ایجنڈے کی تکمیل چاہتے ہیں۔
ان کا کہنا تھا کہ 2014 میں پاکستان ایک مضبوط ملک کے طور پر ابھر کر سامنے میں آیا جس کی کرنسی اور معیشت مستحکم ہورہی ہے۔
انہوں نے مذاکرات کے سوال پر کہا کہ ہمیں پاکستان کے عوام کو جواب دینا ہے ایک ایسا شخص جو ملک دشمنی پر اترا ہوا ہے اس سے مذاکرات کرنے سے پہلے سو بار سوچنا پڑے گا۔
انہوں نے کہا کہ ایک محبِ وطن پاکستانی کی حیثیت سے وہ عمران خان کے ایجنڈے کا بھرپور مقابلہ کریں گے۔
Pervez Rashid responses Imran Khan’s call of… by arynews
