غزہ : اسرائیلی جارحیت کےخلاف دنیا کے مختلف ممالک میں احتجاج جاری ہے، دوسری جانب لندن میں مغربی میڈیا کی جانبدارانہ کوریج کے خلاف سیکڑوں مظاہرین نے بی بی سی کے صدر دفتر کے باہر احتجاجی مظاہرہ کیا۔
اسرائیل کی وحشیانہ بمباری سے غزہ لہو لہو ہے، غزہ میں اسرائیل کے انسانیت سوز مظالم پر دنیا بھر کے عوام سراپا احتجاج ہیں، بھارتی شہر کولکتہ میں شہری فلسطینیوں کی حمایت میں سڑکوں پر نکل آئے اور اسرائیلی بربریت کے خلاف نعرے بازی کی، مقبوضہ جموں کشمیر کے دارالحکومت سرینگر میں ہزاروں افراد نے غزہ میں اسرائیلی جارحیت کے خلاف احتجاج کیا اور فلسطینی عوام کی حمایت میں نعرے لگائے۔
برطانوی دارالحکومت لندن میں برٹش براڈ کاسٹنگ کارپوریشن ہاوس آکسفورڈ سرکس کے باہر ہزاروں افراد نے مغربی میڈیا اور بالخصوص بی بی سی کی اسرائیلی جارحیت کی یکطرفہ کوریج اور نہتے فلسطینیوں کے حق میں مظاہرہ کیا، فلسطینیوں سے اظہار یکجہتی کرتے ہوئے مظاہرین کا کہنا تھا کہ بی بی سی اور مغربی میڈیا ظالم اسرائیل کو معصوم بنانے پر تلا ہوا ہے۔
مظاہرین نے فلسطین کے حق میں اور اسرائیل و مغربی میڈیا کیخلاف پلے کارڈ اٹھا رکھے تھے، مظاہرین نے برٹش براڈ کاسٹنگ کارپوریشن کو متعصب نشریاتی ادارہ قرار دیدیا، گزشتہ ایک ہفتے میں لندن میں ہونے والا یہ تیسرا بڑا احتجاجی مظاہرہ ہے۔
