قومی ائیرلائن کی پرواز پی کے سیون فائیو ایٹ تین روز کی اذیت ناک تاخیر کے ساتھ لندن سے لاہور پہنچ گئی، صبرآزما سفر کے اختتام پرمسافروں نے شدیدناراضی کااظہار کیا۔
شادیاں رک گئیں، خوشیوں کے رنگ پھیکے پڑگئے، لوگ پیاروں کے جنازے میں شرکت سے محروم رہے، باکمال سروس کا دعوی کرنے والی پی آئی اے نے مسافروں کورُلا دیا۔
قومی ائیرلائن کی پرواز پی کے سیون فائیو ایٹ کے تین سوبیس مسافروں کا تکلیف دہ سفر بالآخر تمام ہوا اور وہ تین دن کی تاخیر سے لندن سے لاہور پہچننے میں کامیاب ہوگئے۔
پی آئی اے کے جہاز کے کنٹرول پینل خراب ہونے کی قیمت مسافروں کو تین دن تک ذہنی اذیت کی شکل میں اٹھانا پڑی، مسافروں کے احتجاج کا پی آئی اے نے کوئی خاص نوٹس لیا نہ ہی سہولتیں فراہم کیں۔
مسافروں کا کہنا تھا پی آئی اے سے سفر نے شادی بیاہ کی تقریبات کو بھی خطرے میں ڈال دیا، پی آئی اے کی نااہلی سے پریشان مسافروں کا کہنا تھا کہ پی آئی اے کوسروس بہتر بنانے پر توجہ دینا چاہئیے۔