لاہور: زیرِتعمیرعمارت میں کرنٹ لگنے سے تین مزدور جاں بحق ہوگئے، حادثہ حفاظتی تدابیراختیارنہ کرنے کے سبب پیش آیا۔
تفصیلات کے مطابق اتوار کی صبح لاہور کے علاقے شالیمار کے ہٹلرچوک پرواقع زیرِ تعمیر عمارت میں تین مزدور کرنٹ لگنے کے سبب جاں بحق ہوگئے۔
ریسکیو ذرائع کے مطابق تینوں مزدورعمارت میں شٹرنگ کا کام انجام دے رہے تھےکہ ایک ہائی ٹینشن لائن سے سریہ ٹکرانے کے سبب حادثے کا شکار ہوگئے۔
اسپتال ذرائع کے مطابق جاں بحق مزدوروں کے نام بشیر، نصیر اوراحمد نواز ہیں اورتینوں آپس میں رشتے دار ہیں۔
تینوں مزدوروں کی میتیں ان کے گھروں پر پہنچادی گئی ہیں۔ میتیوں کے پہنچتے ہی علاقے میں کہرام برپا ہوگیا اہلِ محلہ کثیرتعداد میں مقتولین کے گھر پر جمع ہوگئے۔
ریسکیو ذرائع کے مطابق یہ سانحہ حفاظتی انتظامات اختیار نہ کرنے اور مزدوروں کی ضروری تربیت نہ ہونے کے سبب پیش آیا۔
