لاہور: سانحہ یوحناآباد کے مظاہرین کے حملے سے بچنے کے لئےگاڑی تلے کئی لوگوں کو کچلنے والی خاتون کی ضمانت میں توسیع کردی گئی ہے۔
لاہور کے علاقے یوحنا آباد میں 15 مارچ کو ہونے والےچرچ دھماکوں کے ردعمل میں مظاہرین نے جذبات سے مغلوب ہوکر توڑ پھوڑ شروع کردی تھی۔
اس واقعے کے دوران جب مریم صفدر نامی اسکول ٹیچرکی گاڑی پرحملہ کیا گیا تو اس نے گبھراہٹ میں تیزی سے گاڑی لے کرجائے وقوعہ سے نکلنے کی کوشش کی جس کے نتیجے میں کئی افراد زخمی ہوئے جن میں سے تین دم توڑگئے۔
بلوائیوں کوکچلنےوالی خاتون کی ویڈیو منظرعام پرآگئی
مریم صفدرکی آج عدالت میں پیشی تھی لیکن ان کی جانب سے ان کے وکیل نے میڈیکل سرٹیفیکٹ پیش کیا اورعدالت سے استدعا کی بیماری کے باعث ان کی موکلہ عدالت میں پیش ہونے سے قاصر ہیں لہذا انہیں آج کی حاضری سے مستثنیٰ قراردے کرضمانت میں توسیع کی جائے۔
عدالت نے وکیل کی جانب سے پیش کئے جانے والے دستاویز کا بغور معائنہ کرنے کے بعدمریم صفدر کو آج کی پیشی سے مستثنیٰ کرتے ہوئے ان کی عبوری ضمانت میں 4 اپریل تک کی توسیع کردی ہے۔
