لاہور: کوٹ لکھپت جیل میں اکرام الحق عرف لاہوری کو پھانسی دے دی گئی۔
جھنگ کے رہائشی اکرام الحق عرف لاہوری کو فیصل آباد کی انسدادِ دہشت گردی کی عدالت نے شور کوٹ میں نیر عباس نامی شخص کو فرقہ وارانہ بنیادوں پر قتل کرنے کے جرم میں پھانسی کی سزا سنائی تھی۔
آٹھ جنوری کو مقدمہ مدعی الطاف حسین نے پھانسی سے کچھ دیر قبل انہیں معاف کردیا تھا ، جس کے بعد پھانسی کو روک دیا گیا اور کیس کو دوبارہ ٹرائل کورٹ بھجوا دیا گیا۔ جہاں پر عدالت نے سزا کو برقرار رکھا۔
عدالت نے اکرام الحق عرف لاہوری کے دوبارہ ڈیتھ وارنٹ جاری کرتے ہوئے سترہ جنوری کو پھانسی لگانے کا حکم دیا تھا، مختلف عدالتوں میں اکرام الحق کی اپیلیں مسترد ہو چکی تھیں، جس کے بعد صدر مملکت نے بھی ان کی رحم کی اپیلیں مسترد کر دی تھیں۔
کوٹ لکھپت جیل میں پھانسی کے موقع پر جیل اور اطراف میں سخت سکیورٹی انتظامات کیے گئے تھے۔
یاد رہے کہ آٹھ جنوری کو اکرام الحق کی پھانسی ملتوی کر دی گئی تھی
سزائے موت پر عملدرآمد پر سے پابندی اٹھائے جانے کے بعد یہ بیسویں پھانسی ہے۔
واضح رہے کہ وزیرِ اعظم نواز شریف نے پشاور میں گذشتہ ماہ 16 دسمبر کو آرمی پبلک اسکول میں طالبان کے حملے میں 132 بچوں سمیت 150 افراد کی ہلاکت کے بعد سزائے موت کے عمل درآمد پر پابندی ختم کرنے کا اعلان کیا تھا۔
