اسلام آباد: پاکستان تحریک انصاف کے سربراہ عمران خان نے آزادی مارچ دھرنے کے شرکاء سے خطاب کرتے ہوئے کہا کہ جب لاہوربند ہوگا تو سب کو پتہ چل جائے گا کہ دھاندلی کہاں ہوئی۔
ان کا کہنا تھاکہ اگرپاکستان میں جمہوریت ہے تو پرامن احتجاج کرنا ہرشہری کا حق ہے یہ بات حکومت کو سمجھنا ہوگی۔
اگر کسی کو حق نا ملے اور وہ نواز شریف جیسے طاقتور کے سامنے احتجاج کرے تو طاقتور کو کبھی یہ حق نہیں پہنچتا کہ وہ احتجاج کرنے والے پرطاقت کا استعمال کرے۔
پاکستان میں عوام ایک معمولی تھانے دارکے خلاف بھی آوازنہیں اٹھا سکتے کیونکہ انہیں خود نہیں معلوم کہ ان کو قانون میں کیا حقوق حاصل ہیں، انہوں عوام سے کہا کہ اب یہ ناانصافی برداشت نہیں کرنی ہے۔
انہوں نے حکمرانوں کو خبردارکیا کہ ایاز صادق سپریم کورٹ جانے کا سوچ رہے ہیں لیکن یاد رکھیں کہ سپریم کورٹ میں دھاندلی نہیں چلے گی۔
انہوں نے ایک بار پھر مسلم لیگ ن کو چیلنج کیا کہ خیبر پختونخواہ کے کسی حلقے میں تحقیق کرالیں ہم ہرحلقہ کھولنے کے لئے تیارہیں۔
انہوں نے کہا کہ 15 دسمبر کو جب لاہوربند ہوگا تو سب کو پتہ چل جائے گا کہ دھاندلی کہاں ہوئی ہے۔
