لاہور: ڈیفنس غازی پور لاہور میں سابق وزیرِاعظم یوسف رضا گیلانی کے بیٹے کے اسکو اڈ میں شامل اہلکاروں کی مبینہ فائرنگ کے نتیجے میں ایک نو جوان جاں بحق ہو گیا، پولیس نے عبدالقادر گیلانی اور ان کے محفظوں کیخلاف قتل کا مقدمہ درج کرکے تحقیقات شروع کردیں ہیں۔
ڈیفنس لاہور کے علاقے میں غازی روڈ پر پیپلز پارٹی کے رہنماء اور سابق وزیرِاعظم یوسف رضا گیلانی کے صاحبزادے اسکواڈ کے ہمراہ جا رہے تھے کہ محافظوں نے موٹرسائیکل سوار دو بھائیوں کو راستے چھوڑنے کیلئے آواز لگائی اور پھر مبینہ طور پر فائرنگ کر دی، جس کے نتیجے میں تئیس سالہ طاہر گولی لگنے سے موقع پر دم توڑ گیا۔
لواحقین نے لاش سڑک پر رکھ کر احتجاج شروع کر دیا، اس موقعے پر مقتول کے ماموں محسن نے بتایا کہ دونوں بھائی عید کا گوشت دینے جا رہے تھے کہ سابق وزیرِاعظم گیلانی کے بیٹے کے اسکواڈ میں موجود اہلکاروں نے فائرنگ کر دی۔
مقتول کے ماموں کا مزید کہنا ہے کہ فائرنگ کرنے والی گاڑی کا نمبر ان کے پاس موجود ہے، مقدمہ درج کرائیں گے، پولیس نے عبدالقادر گیلانی اور انکے محافظوں کیخلاف قتل کا مقدمہ درج کر کے تحقیقات شروع کردی ہیں۔
