سیہون: لعل شہبازقلندرکے عرس میں شدید گرمی اورمختلف حادثات کے باعث آج بھی ایک خاتون سمیت چھ زائرین جان بحق ہوگئے جبکہ کل سے آج تک ہلاکتوں کی تعدادچودہ ہوگئی ہے۔
سیہون شریف میں حضرت لعل شہبازقلندرکاسات سوتریسٹھواں عرس جاری ہے،عرس کے دوسرے روزبھی ملک بھرسے زائرین کی آمدکاسلسلہ جاری ہے، ہزاروں کی تعدادمیں لوگ موجود ہیں جبکہ شدیدگرمی اورحبس کاعالم ہے جس کی وجہ سے اب تک کئی زائرین اپنی جان سے ہاتھ دھوچکے ہیں۔
ضلعی انتظامیہ اورحکومتِ سندھ کے ناقص انتظامات نے اُن کے دعوؤں کی قلعی بھی کُھول دی ہے، روزانہ کئی افرادگرمی اورپانی کی عدم دستیابی کے باعث ہلاک ہورہے ہیں، گرمی کے ستائے زائرین دفعہ ایک سوچوالیس عائد ہونے کے باوجود نہر کارُخ کرتے ہیں اوراپنی زندگیاں کھوبیٹھتے ہیں۔
دوسری جانب ضلعی انتظامیہ اتنی ہلاکتوں کے باوجودبھی کوئی نوٹس نہیں لے رہی، جبکہ ڈپٹی کمشنر جامشورو کا کہنا ہے کہ اتنے زائرین کوسہولیات فراہم کرنے کے لئے بجٹ ناکافی ہے۔
پانی کے لئے بنائی گئی بیس سبیلیں ہزاروں زائرین کی پیاس بجھانے کے لئے ناکافی ہیں، پیپلزپارٹی کے کوچئیرمین آصف علی زرداری کی جانب سے زائرین کومفت منرل واٹرکی بوتلیں تقسیم کرنے کااعلان توہوالیکن یہ صرف اعلانات کی حدتک ہی محدودرہا۔
