ملتان: ملتان کے حلقہ این اے 149 سے ضمنی انتخاب لڑنے والے سنیئر سیاستدان جاوید ہاشمی کی انتخابی مہم کے سلسلے میں ہیلی کاپٹر کے زریعے پمفلٹ برسائے گئے۔
الیکشن کمیشن کی جانب سے پولنگ جمعرات کو کروانے کا کہا گیا تھا جبکہ انتخابی مہم دو روز قبل ختم کرنے کی ہدایت دی گئی تھی۔انتخابی مہم گزشتہ رات ہی ختم ہوگئی تھی تاہم اس کے باوجود جاوید ہاشمی کی اشتہاری مہم جاری رہی۔
ہیلی کاپٹر سے ہزاروں کی تعداد میں جاوید ہاشمی کے پمفلٹ شہر بھرمیں گرائے گئے جن پر جاوید ہاشمی کی تصویر، انتخابی نشان بالٹی، اور ایک بہادر آدمی ہاشمی ہاشمی کے نعرے درج ہیں۔
شاہ محمود قریشی نے الزام عائد کیا ہے کہ جاوید ہاشمی کی انتخابی مہم کے لئے سرکاری وسائل استعمال کئے جا رہے ہیں، انتخابی مہم ختم ہونے کے باوجود جاوید ہاشمی کی تشہیری مہم جاری رکھنا ضابطہ اخلاق کی خلاف ورزی ہے۔
جاوید ہاشمی کا کہنا ہے کہ فضأ میں پمفلٹ گرانا کوئی مہم نھیں، پمفلٹ گرانے میں کم اخراجات آتے ہیں، آج بھی اخبارات میں اشتہار چھپے ہیں ، یہ تشہیری مہم نھیں اشتہار ہے ۔
دوسری جانب الیکشن کمیشن نے پمفلٹ کی تقسیم کا نوٹس لے لیا ہے اور ہیلی کاپٹرسے پمفلٹ گرانے کی فوٹیج منگوالی ہے۔ ترجمان کا کہنا ہے کہ ضابطہ اخلاق کی خلاف ورزی ثابت ہونے پر امیدوار نا اہل قرار دیا جاسکتا ہے۔
