لاہور: لاہور ہائیکورٹ نے ممبئی حملہ کیس کے ملزم ذکی الرحمٰن لکھوی کی نظربندی کیخلاف درخواست پر فیصلہ محفوظ کرلیا ہے۔
جسٹس محمود مقبول باجوہ نے کیس کی سماعت کی، ذکی الرحمٰن لکھوی کی جانب سے عدالت کو بتایا گیا کہ حکومت نے غیر قانونی طور پر انہیں نظربند کر رکھا ہے
اس سے قبل بھی انہیں تین بار نظر بند کیا گیا تاہم اسلام آباد ہائیکورٹ نے نظربندی ختم کرنے کا حکم دیا تھا۔
عدالت کے حکم کے باوجود ڈی سی او اوکاڑہ نے ایک بار پھر ایک ماہ کی نظربندی کے احکامات جاری کئے ہیں جبکہ حکومت کے پاس انہیں نظربند کرنے کیلئے کوئی ٹھوس جواز موجود نہیں ہے۔ حکومت کا یہ عمل عدالتی احکامات کی خلاف ورزی ہے، جسے کالعدم قرار دے کر رہا کرنے کا حکم دیا جائے۔
سرکاری وکیل نے دلائل دیئے کہ ذکی الرحمٰن لکھوی کو ہائیکورٹ کے بجائے متعلقہ ڈی سی او رجوع کرنا چاہیئے، اس لئے درخواست مسترد کی جائے، عدالت نے وکلاء کے دلائل مکمل ہونے پر فیصلہ محفوظ کرلیا ہے۔
