فرانسیسی جزیرے لاری یونین سے جہاز کے ملبے کا ایک ٹکڑا ملا ہے اور ماہرین نے خیال ظاہر کیا ہے کہ یہ ٹکڑا ملائیشین ائیر لائن کی پرواز MH370 کا بھی ہو سکتا ہے جو پچھلے سال مارچ میں 239 مسافروں کے ساتھ لاپتہ ہو گیا تھا۔
تفصیلات کے مطابق فرانسیسی حکام نے 2 میٹر لمبا ملبے کا ٹکڑا جس کے ابتدائی معائنے سے خیال ظاہر کیا جا رہا ہے کہ یہ جہاز کے ”پر“ کا حصہ بھی ہو سکتا ہے، کو تحویل میں لے لیا ہے اور اب طیارہ حادثے کی تحقیقات کرنے والے ماہرین کی ٹیم اس کا معائنہ کرنے کیلئے جلد فرانس پہنچ جائے گی۔ ذرائع کے مطابق ماہرین ٹکڑے کا تجزیہ کرنے کے علاوہ اس پر موجود سیریل نمبر کے ذریعے حقائق کا پتہ چلانے کی کوشش کریں گے۔
Similitudes incroyables entre le flaperon d’un #B777 et le débris retrouvé ce matin à #LaReunion… #MH370 ? pic.twitter.com/GDkzRLwi2h
— Xavier Tytelman (@PeurAvion) July 29, 2015
لاری یونین جزیرے کے کچھ افراد ساحل سمندر پر صفائی کا کام کر رہے تھے کہ اسی دوران انہیں یہ ٹکڑا ملا۔ ایک عینی شاہد کے مطابق یہٹکڑا مکمل طور پر سیپیوں سے ڈھکا ہوا تھا جس سے یہ اندازہ ہو سکتا ہے کہ کافی دیر سے پانی میں تھا۔ ماہرین اسی وجہ سے یہ خیال بھی ظاہر کر رہے ہیں یہ ٹکڑا ملائیشیا کی پرواز ایم ایچ370 کے ملبے کا ٹکڑا بھی ہو سکتا ہے۔
ملیشیا نے مغربی بحرِہند میں واقع جزیرے کی جانب اپنی ٹیم روانہ کردی ہے جو کہ یہ تحقیقات کرے گی کہ آیا یہ ٹکڑا ملیشیا کے گمشدہ طیارے کا ہے کہ نہیں۔
ملیشین ایئرلائنز نے اپنے جاری کردہ بیان میں کہا ہے کہ ابھی یہ کہنا قبل ازوقت ہے کہ آیا یہ ملیشین جہاز کا ٹکڑا ہے بھی کہ نہیں ہے۔
واضح رہے کہ ملائیشیا کا طیارہ MH370 گزشتہ سال مارچ میں کوالالمپور سے 239 مسافروں کو لے کر بیجنگ کیلئے رونہ ہوا تھا اور لاپتہ ہو گیا تھا۔ عالمی سطح پر تحقیقات کے باوجود نہ تو اس کا ملبہ ملا اور نہ ہی اس میں سوار مسافروں کا پتہ چلایا جا سکا جس کے بعد ملائیشین حکام نے اعلان کیا تھا کہ طیارے پر سوار تمام مسافروں کی موت کو یقینی تصور کیا جائے۔
