لندن: منی لانڈرنگ کیس میں ایم کیو ایم کے قائد الطاف حسین کی ضمانت میں جولائی تک توسیع کردی گئی۔
متحدہ قومی موومنٹ کے ترجمان کے مطابق میٹروپولیٹن پولیس نے منی لانڈرنگ کے الزام کے سلسلے میں پہلے سے جاری تفتیش کے سلسلے میں ایم کیوایم کے قائد الطاف حسین کی ضمانت میں جولائی تک کیلئے توسیع کردی ہے۔
تفصیلات کے مطابق ایم کیو ایم کے قائد الطاف حسین کے خلاف منی لانڈرنگ کیس برطانیہ کی عدالت میں جاری ہے جہاں ان کی ضمانت کی مدت ختم ہونے کے بعد انہیں مقامی پولیس سٹیشن آنا تھا۔
متحدہ قومی موومنٹ کے قائد الطاف حسین کی منی لانڈرنگ کیس میں ضمانت آج ختم ہونےپر الطاف حسین اپنی رہائش گاہ سے میٹروپولیٹن پولیس اسٹیشن پہنچے، جہاں ایم کیوایم قائد سے لندن پولیس اسٹیشن میں پانچ گھنٹے تک پوچھ گچھ کی گئی۔
اس سے قبل پولیس اسٹیشن پہنچتے ہوئے ایم کیو ایم کے قائد الطاف حسین نے میڈیا سے گفتگو کرتے ہوئے تمام اہل وطن کو سلام کہتے ہوئے ان کے لئے دعا کی اپیل کی۔
تفصیلات کے مطابق ایم کیو ایم کے قائد کے ہمراہ ان کے وکلاء کی ٹیم اور پارٹی کے سینئر عہدیداران فاروق ستار اور بابر غوری بھی موجود تھے۔
