میانوالی: تحریکِ انصاف کراچی اور لاہور میں سیاسی قوت کا مظاہرہ کرنے کے بعد آج تیسرا جلسہ میانوالی میں کر رہی ہے، عمران خان کے آبائی علاقے میانوالی میں تحریک انصاف کے جلسے کی تیاریاں مکمل کرلی گئیں ہیں۔
تحریکِ انصاف کی جانب سے میانوالی میں آج کا جلسہ خصوصی اہمیت کا حامل ہے، گذشتہ روز پی ٹی آئی کے پُرجوش کارکن دن بھر ریلیوں کی شکل میں گشت کرتے رہے، جلسہ کیلئے دن دو بجے کا وقت دیا گیا پر توقع کی جارہی ہے جلسہ چار بجے تک شروع ہوگا۔
جلسہ گاہ کو پی ٹی آئی کے جھنڈوں سے سجایا گیا ہے جبکہ پینتیس ہزار کرسیاں لگادی گئیں ہیں، جلسہ گاہ کا اسٹیج انیس فٹ اونچا بیس فٹ چوڑا اور اسی فٹ لمبا بنایا گیا ہے، سیکیورٹی کیلئے واک تھرو گیٹ بھی لگائے جا رہے ہیں۔
عمران خان کو ہیلی کاپٹر سے اترنے کے بعد سخت سکیورٹی میں جلوس کی شکل میں جلسہ گاہ لایا جائے گا۔
سہ پہر میں ہونے والا جلسہ اس لیےخصوصی اہمیت کا حامل ہے کہ میانوالی عمران خان کا آبائی شہر ہے، یہاں عمران خان کا آبائی گھر اور قبرستان بھی ہے، جہاں ان کے دادا، دادی ، چچا اوران کے والد اکرام اللہ خان نیازی کی قبریں ہے، جہاں عمران خان نے اپنی سیاسی زندگی کا آغاز کیا تھا، وہ یہاں سے دوہزار دو اور دو ہزار تیرہ کے انتخابات میں قومی اسمبلی کے رکن منتخب ہوئے تھے۔
عمران خان نے اپنی سیاسی زندگی کا آغاز میانوالی سے کیا تھا، وہ یہاں سے 2002 اور 2013 ء کے انتخابات میں قومی اسمبلی کے رکن منتخب ہوئے۔
