لندن :برطانیہ میں عام انتخابات کے بعد نئی کابینہ کی تشکیل کیلئے صلاح مشورے جاری ہیں، کنزرویٹوپارٹی نے عام انتخابات میں سادہ اکثریت حاصل کرلی ہے۔ پارلیمنٹ کا افتتاحی اجلاس اٹھارہ مئی کوہوگا۔
برطانیہ میں چھ سو پچاس نشستوں پر مشتمل دارالعوام کے لئے عوام نے نمائندے منتخب کرلئے، کنزرویٹوپارٹی تین سواکتیس نشستیں جیت کر ایک بار پھرحکومت بنائے گی ۔
کنزرویٹو پارٹی کے سربراہ ڈیوڈ کیمرون نے انتخابات جیتنے کے فورا بعد سابقہ کابینہ کے چاراہم وزیروں کو نئی کابینہ میں بھی رکھنے کا اعلان کیا ہے، ان میں وزیر خزانہ جارج اوسبورن، وزیرداخلہ تھریسا مے، وزیرخارجہ فلپ ہیمنڈاوروزیردفاع مائیکل فیلن شامل ہیں۔
نئی برطانوی پارلیمنٹ کا افتتاحی اجلاس اٹھارہ مئی کو ہوگا، نئی پارلیمنٹ میں خواتین اور نسلی اقلیتوں کی نمائندگی میں ریکارڈ اضافہ ہوا ہے۔ خواتین ارکان کی تعداد ایک سوتینتالیس سے بڑھ کرایک سواکیانوے ہوگئی ہے جبکہ نسلی اقلیت کے نمائندوں کی تعدادستائیس سے بیالیس ہوگئی۔
اپوزیشن جماعتوں کے رہنما ایڈ ملی بینڈ، نک کلیگ اور نائجل فیراج نے انتخابات میں ناکامی کے بعد استعفی دے دیا ہے اور یہ جماعتیں نئے رہنما منتخب کریں گی جو حزب اختلاف کا کردار ادا کریں گے۔
