نئی دلی: بھارت میں سڑسٹھواں یوم جمہوریہ منایا جا رہا ہے، نئی دلی میں تقریب میں امریکی صدربراک اوباما مہمان خصوصی تھے۔
بھارت میں آئین کی منظوری کے دن کو یومِ جمہوریہ کے طورپر منایا جاتا ہے، سڑسٹھویں یومِ جمہوریہ کی تقریب میں امریکی صدر براک اوباما بطور مہمان خصوصی شریک ہوئے۔
براک اوباما وہ پہلے امریکی صدر ہیں، جنہوں نے بھارت کے یومِ جمہوریہ کی تقریب میں شرکت کی۔
اس موقع پر متعدد ممالک کے سفیر اور اعلی بھارتی سول وفوجی حکام بھی موجود تھے، امریکی صدر کی آمد اور یومِ جمہوریہ پر سیکورٹی کے غیرمعمولی اقدامات کئے گئے تھے اور دوگھنٹے تک چار سو کلومیٹر تک کے علاقے کو نو فلائی زون قرار دیا گیا تھا۔
یاد رہے کہ امریکی صدربراک اوباما اپنی اہلیہ کے ہمراہ بھارت کے تین روزہ دورے پر ہیں۔
دورۂ بھارت کے اختتام پر امریکی صدرسعودی عرب جائیں گے، جہاں وہ شاہ عبداللہ کے انتقال پرتعزیت اور نئے سعودی فرمانروا سے ملاقات کریں گے۔
گزشتہ روز امریکی صدر بارک اوباما نے سلامتی کونسل کی مستقل رکنیت کیلئے بھارت کی حمایت کا اعلان کردیا، دونوں ملکوں کے درمیان دفاع کے شعبے میں تعاون پربھی اتفاق ہوا ہے۔
واضح رہے کہ امریکی صدر بارک اوباما تین روزہ دورے پر بھارت پہنچے تو نئی دہلی ائیر پورٹ پر نریندر مودی نے ان کا استقبال کیا۔ جس کے بعد امریکی صدرباراک اوباما کا بھارتی صدارتی محل آمد پر بھی شاندار استقبال کیا گیا، صدارتی محل میں باراک اوباما کو گارڈ آف آنر پیش کیا گیا۔
امریکی صدر نے مہاتما گاندھی کی یادگار پر حاضری بھی دی۔
