اسلام آباد: عالمی آڈٹ فرم کے پی ایم جی کی رپورٹ نے وفاقی وزیر اطلاعات پرویز رشید کی جانب سے تحریک انصاف کے سیکر یٹری جنرل جہانگیر خان ترین پرنجی طیارے کے غلط استعمال اور بے ضابطگیوں کے الزامات کو بے بنیاد قرار دے دیا۔
ذرائع کے مطابق پرویز رشید کی جانب سے الزامات عائد کئے جانے کے بعد کے پی ایم جی نے رپورٹ جہانگیر ترین کی درخواست پر تیار کی ہے ۔رپورٹ جہانگیر ترین کے جہاز کے نجی استعمال کے آڈٹ کے حوالے سے ہے ۔
اے آ ر وائی نیوز کو موصول ہونے والی کے پی ایم جی کی آڈٹ رپورٹ کے مطابق جہانگیر خان ترین کی جانب سے جے ڈی ڈبلیو کمپنی کے زیر استعمال جہاز کے حوالے سے کوئی بے ضابطگی سامنے نہیں آئی اور کمپنی کے تمام کھاتہ جات اور طیارے کی لاگ بگ کا ریکارڈ تسلی بخش ہے ۔
رپورٹ کے مطابق جہانگیر ترین نے طیارے کے نجی استعمال کی مد میں کمپنی کو 4کروڑ79لاکھ سے زائد کی ادائیگی کی ہے اور اس مد میں جہانگیر ترین کے ذمے کمپنی کے کوئی واجبات نہیں ہیں۔
کمپنی کی گذشتہ سالانہ آڈٹ رپورٹوں میں جہاز کے اخراجا ت کی تمام تر تفصیلات درج ہیں۔ ذرائع کے مطابق جے ڈی ڈبلیو کمپنی میں جہانگیر ترین اور اہل خانہ کے شیئرز 60 فیصد سے زائد ہیں۔
