اسلام آباد : نواز شریف کے پرنسپل سیکرٹری فواد حسن فواد کو وزیراعظم شہبازشریف کا مشیر بنانے پر غور کیا جارہا ہے۔ جبکہ وسیم اختر کو گورنر سندھ بنانے کی تجویز سامنے آئی۔
تفصیلات کے مطابق سابق پرنسپل سیکرٹری فواد حسن فواد کو وزیر اعظم شہبازشریف کا مشیر بنانے پر غور کیا جارہا ہے، فواد حسن فواد نواز شریف کے پرنسپل سیکریٹری بھی رہ چکے ہیں۔
سابق سیکرٹری داخلہ اعظم سلیمان کو بھی اہم عہدہ دینے کا امکان ہے جبکہ جے یو آئی کے اکرم درانی کو گورنر خیبرپختوانخوا اور وسیم اختر کو گورنرسندھ بنانے کی تجویز سامنے آئی ہے۔
یاد رہے اسٹیبلشمنٹ ڈویژن نے 3 افسران کو وزیراعظم ہاؤس میں تعینات کردیا ، جن میں گریڈ 19 کے افسر سمیر احمد سید اور محمد علی رندھاوا شامل ہیں۔
خیال رہے وفاقی بیوروکریسی میں اہم تقرریوں اور تبادلوں کاامکان ہے ، اس سلسلے میں وزیراعظم آفس نے پچیس بیوروکریٹس کے نام شارٹ لسٹ کرلیے ہیں ، یہ افسران ن لیگ کےساتھ پنجاب اوروفاق میں کام کرچکے ہیں۔
