پشاور:خیبر پختون خواہ اسمبلی میں پرویزخٹک کے خلاف عدم اعتماد کی تحریک لانے کیلئے اپوزیشن جماعتوں نے جماعت اسلامی اور عوامی جمہوری اتحاد سے رابطے شروع کردئے ہیں۔
مسلم لیگ ن نے خیبر پختون خوا میں تحریک انصاف کی حکومت کے خلاف تحریکِ عدم اعتماد لانے کا فیصلہ کرلیا ہے۔
تحریک انصاف نے انتخابی دھاندلیوں کے خلاف احتجاج کرکے وفاقی حکومت پر دباؤ بڑھایا تو ن لیگ نے بھی خیبر پختوں خوا میں سیاسی ہتھیار آزمانے کی دھمکی دے دی ہے۔
خیبر پختون خوا اسمبلی میں مسلم لیگ ن کے پارلیمانی لیڈر سردار اورنگزیب نلوٹھہ کا کہنا ہے کہ وہ دیگر اپوزیشن جماعتوں کے ساتھ مل کر جلد تحریک انصاف کی حکومت کے خلاف قرارداد جمع کرائیں گے۔
سرداراورنگزیب نلوٹھہ کا کہنا ہے اسمبلی اجلاس بلائے جانے کے بعد بھاری اکثریت سے تحریک انصاف حکومت کیخلاف تحریک عدم اعتماد منظورکرائی جائے گی۔
اے آر وائی نیوز کے نمائندے اظہر فاروق کا کہنا ہے کہ اس سلسلے میں مولانا فضل الرحمن اور ان کی جماعت جمعیت علمائے اسلام (ف)اہم کردار اد اکریں گے اور اس سلسلے میں ایک اجلاس بھی طلب کیا گیا تھا جس میں گورنر خیبر پختونخوا بھی شامل تھے۔