نیپال : زلزلے سے ہلاکتوں کی تعداد چار ہزار تین سو پچاس سے تجاوز کرگئی جبکہ سات ہزار افراد زخمی ہیں، تباہ کن زلزلے سے دس لاکھ افراد متاثر ہوئے ہیں۔ عالمی برادری کی جانب سے نیپال میں امداد بھیجنے کا سلسلہ جاری ہے، پاکستان سے مزید دو امدادی طیارے کٹھمنڈو پہنچ گئے۔
نیپال میں تین روز قبل آنے والے قیامت خیز زلزلے نے بڑے پیمانے پر انسانی المیے کو جنم دیا، متاثرہ علاقوں میں امدادی کارروائیاں جاری ہیں تاہم تباہی اتنی زیادہ ہے کہ بہت سے جگہوں پردواؤں اورکھانے پینے کی اشیاء اور ایندھن ختم ہوچکا ہے۔
بین الاقوامی ادارے اور مختلف ممالک کی جانب سے امدادی سرگرمیاں جاری ہیں، پاکستان کی جانب سے مزید دو سی ون طیارے امدادی سامان لے کر کٹھمنڈو پہنچ گئے۔ کٹھمنڈوخیموں کے شہر میں تبدیل ہوگیا ہے اور آفٹرشاکس کے خوف سے لوگ کھلے آسمان تلے رہ رہے ہیں۔
زلزلے کے پچاس گھنٹے بعد ایک خاتون کو ملبے سے زندہ نکال لیا گیا، دوردراز علاقوں میں اب تک امداد نہیں پہنچ سکی۔ زلزلے سے متعدد شہر اورقصبے ملبے کے ڈھیرمیں تبدیل ہوچکے ہیں۔ پورے ملک میں ایمرجنسی نافذ ہے۔ سڑکیں، بجلی اورمواصلات کا نظام بھی تباہ ہوگیا، جگہ جگہ ملبے کے ڈھیرکے باعث امدادی کارروائیوں میں مشکلات پیش آرہی ہیں۔
زلزلے کے مرکز کی قریبی آبادیوں تک پہنچنے کے لئے ملبہ صاف کر کے راستہ ہموار کیا جا رہا ہے۔ ہرگزرتے دن کے ساتھ ہلاکتیں بڑھتی جا رہی ہیں۔
حکام نے ہلاکتوں میں مزید اضافے کا خدشہ ظاہر کیا ہے۔
دنیا کی سب سے بلند چوٹی ماؤنٹ ایورسٹ بھی زلزلے سے ہل گئی، چوٹی سر کرنے والے درجنوں سیاحوں میں سے سترہ زلزلے کے بعد برفانی تودے گرنے سے جان سے ہاتھ دھوبیٹھے۔
