اسلام آباد: آئندہ مالی کے لیے پینتالیس کھرب سے زائد کا وفاقی بجٹ آج پیش کیا جائے گا۔ پارلیمنٹ سے پہلے وفاقی کابینہ کے خصوصی اجلاس میں بجٹ تجاویز کی منظوری دی جائے گی۔
موجودہ حکومت کا تیسرا بجٹ آج پیش کیا جارہا ہے، مجموعی ترقی کی شرح کا ہدف پانچ اعشاریہ پانچ فیصد رکھا گیا ہے، ٹیکس وصولی کا ہدف تین ہزار ایک سو تین ارب روپے مقرر کرنے کا فیصلہ کیا گیا ہے، بڑی کمپنیوں پر اضافی ٹیکس لگائے جائیں گے، جوس مشروبات اور دیگر اشیاء پر کسٹم ڈیوٹی ختم کی جائے گی۔
بجٹ میں قرضوں کی ادائیگی کے لئےتیرہ کھرب دس ارب روپے رکھے گئے ہیں، صحت کے لئے گیارہ ارب دس کروڑ روپے مختص کرنے کا فیصلہ کیا گیا ہے۔
اعلیٰ تعلیم کیلئے ہائر ایجوکیشن کمیشن کو بیس ارب روپے ملیں گے، دفاع کے لئے سات سو بہتر ارب روپے مختص کئے گئے ہیں، سرکاری ملازمین کی تنخواہوں میں دس فیصد جب کہ پنشن میں پندرہ فیصد تک اضافے کا امکان ہے۔
بے نظیر انکم سپورٹ پروگرام کے لئے ایک سو سات ارب روپے مختص کئے جانے کا امکان ہے۔
وفاق کے ترقیاتی فنڈ کی مد میں سات سو ارب روپے جب کہ صنعتی شعبے کی مد میں چھ اعشاریہ ایک ارب روپے مقرر کئے جانے کا امکان ہے۔
ذرائع کے مطابق حکومت نے برآمدات کا ہدف پچیس ارب پچاس کروڑ روپے مقرر کیا ہے۔
