کراچی: پاکستان کرکٹ بورڈ کے چیف سلیکٹر معین خان نے ورلڈ کپ 2015 کیلئے قومی ٹیم کے ناموں کا اعلان کردیا ہے، نیشنل اسٹیڈیم کراچی میں پریس کانفرنس سے خطاب کرتے ہوئے معین خان نے کہا کہ تیئس سال بعد پاکستانی کھلاڑی آسٹریلیا میں کھیلنے جا رہے ہیں۔
اس ٹیم میں بہت سے کھلاڑی ایسے ہیں جنہوں نے کبھی آسٹریلیا میں پرفارم نہیں کیا۔ ان کا کہنا تھا کہ امید ہے قومی ٹیم اچھا پرفارم کریگی،ٹیم کا اعلان چئرمین پی سی بی شہر یار خان کی منظوری کے بعد کیا گیا ہے،اور ٹیم کی سلیکشن میں کسی قسم کے دباؤ یا سفارش کو قبول نہیں کیا گیا۔
سلیکشن کمیٹی کی باہمی مشاورت کے بعد ٹیم کا اعلان کیا گیا ہے، جس کے مطابق احمد شہزاد،محمد حفیظ، سرفراز احمد، مصباح الحق،یونس خان،حارث سہیل،عمراکمل،صہیب مقصود،شاہد آفریدی،یاسر شاہ،محمد عرفان،جنید خان، احسان عادل،سہیل خان،وہاب ریاض،شامل ہیں۔
ٹیم کی قیادت مصباح الحق کریں گے۔ سابق کپتان شعیب ملک، کامران اکمل، فواد عالم، اسد شفیق اور عمر گل کو ورلڈ کپ کا ٹکٹ نہ مل سکا۔ ڈومیسٹک میں پرفارمنس دکھانے والے میڈیم پیسر سہیل خان کو موقع دیا گیا ہے۔
حارث سہیل ، صہیب مقصود یاسر شاہ، محمد عرفان، احسان عادل، سرفراز احمداپنا پہلا ورلڈ کپ کھیلیں گے۔ آفریدی ٹیم میں سب سے زیادہ پانچویں مرتبہ میگا ایونٹ میں ایکشن میں دکھائی دیں گے۔
یونس خان چوتھا، حفیظ تیسرا ، مصباح الحق اور احمد شہزاد اپنا دوسرا ورلڈ کپ کھیلیں گے۔ پاکستان ایونٹ میں اپنی مہم جوئی کا آغاز پندرہ فروری کو روایتی حریف بھارت کے خلاف میچ سے کرے گا۔
