ملتان: وزیراعظم نوازشریف آج ترقیاتی منصوبوں کے افتتاح کے لئے ملتان پہنچ گئے ہیں، سیکیورٹی انتظامات کے باعث شہریوں کی زندگی اجیرن ہوگئی ہے۔
اے آروائی نیوز کے نمائندے مرزا احمد علی کے مطابق وزیراعظم کی آمد کے موقع پرسیکیورٹی انتہائی سخت انتظامات کئے گئے ہیں اور ایئرپورٹ کی سڑک پر کسی بھی قسم کی گاڑیوں کی آمد ورفت بند کردی گئی ہے۔
وزیر اعظم نے عالمی سطح کےایئرپورٹ کی نئی عمارت کا افتتاح کیا، اس موقع پرسابق وزیر اعظم یوسف رضا گیلانی سمیت جنوبی پنجاب کی کئی اہم شخصیات موجود تھیں
وزیراعظم کے ہمراہ وزیرمملکت عابد شیرعلی بھی موجود تھے۔
ذرائع کے مطابق نیا ایئرپورٹ سالانہ دس لاکھ مسافروں کو سفری سہولیات فراہم کرسکے گا اس کی تعمیر پر ساٹھ ارب روپے لاگت آئی ہے۔
ملتان میں عالمی معیار کے اس ایئرپورٹ کا سنگِ بنیاد 20 جون 2010 کو پیپلز پارٹی کے سابق وزیراعظم یوسف رضا گیلانی نے رکھا تھا۔
وزیراعظم کی آمد کے موقع پرسیکیورٹی کے سخت ترین انتظامات کیے گئے تھے جس کے باعث جدہ سے آٓنے والی پرواز جس میں زیادہ تر عمرہ کی سعادت حاصل کرنے والے افراد شامل تھے کو انتہائی مشکلات کاسامنا کرنا پڑاا مسافروں کو اپنا سامان خود ڈھو کر شدید گرمی میں ایک کلو میٹرتک پیدل چل کرجاناپڑا۔
