اسلام آباد: وزیرِاعظم نوازشریف کی نااہلی کیلئے دائر کی گئی درخواست سپریم کورٹ نے سماعت کیلئے منظور کرلی ہے، کیس کی سماعت جسٹس انور ظہیر جمالی کرینگے۔
پی ٹی آئی جنوبی پنجاب کے رہنماء اسحاق خان خاکوانی نے سپریم کورٹ میں وزیرِاعظم نواز شریف کے خلاف آئین کی آرٹیکل بانسٹھ تریسٹھ کے حوالے سے اپنے وکیل سابق اٹارنی جنرل عرفان قادر کے توسط سے درخواست دی۔
درخواست میں کہا گیا ہے کہ میاں صاحب نے اسمبلی کے فلور پر فوج کے بارے میں غلط بیانی کی،جس کی بناء پر وہ صادق و امین کی شرائط پر پورے نہیں اترتے، جس کا ذکر آئین میں واضح الفاظ میں درج ہے، اس لئے انہیں نااہل قرار دیا جائے، عدالت نے اعتراضا ت کے بعد اپیل منظور کرلی ہے۔
اس سے قبل وزیرِاعظم کی نااہلی کی ایسی ہی درخواست تحریکِ انصاف کے لائرز فورم نے دو ستمبر کو لاہور ہائی کورٹ میں درخواست دائر کی تھی، جسے لاہور ہائی کورٹ کے دو رکنی بنچ نے مسترد کردیا تھا لیکن سپریم کورٹ نے اس معاملے کی درخواست منظور کرلی ہے۔
