کراچی : وزیرِاعظم نوازشریف کور ہیڈ کوارٹر کراچی پہنچ گئے ہیں، جہاں آرمی چیف اور کور کمانڈر کراچی نے وزیرِاعظم سے ملاقات کی۔ آئی ایس پی آر کے مطابق کور ہیڈکوارٹر میں وزیرِاعظم کو سندھ اور کراچی میں آپریشن پر بریفنگ دی گئی جبکہ نیشنل ایکشن پلان اور آپریشن ضربِ عضب پر بات چیت بھی کی گئی۔
دوسری جانب وزیرِاعظم گورنر ہاوس میں آج کراچی آپریشن اور قومی ایکشن پلان پر اعلیٰ سطح اجلاس کی صدارت بھی کریں گے۔
اس سے قبل ڈی جی آئی ایس پی آر کے مطابق آرمی چیف جنرل راحیل شریف نے کراچی میں رینجرز ہیڈ کوارٹر کا دورہ کیا، جہاں ڈی جی رینجرز نے آرمی چیف کوکراچی کی سیکیورٹی کی صورتحال اور شہر میں جاری آپریشن پربریفنگ دی۔
اس موقع پر آرمی چیف جنرل راحیل شریف کا کہنا تھا کہ کراچی میں امن کی بحالی کیلئے ہر ممکن تعاون فراہم کیا جائے گا اور شہر میں قیام امن کےلیے کسی بھی حد تک جائیں گے۔
آئی ایس پی آر کا کہنا ہے کہ آرمی چیف نے رینجرز، پولیس، انٹیلی جنس اداروں کی کارکردگی کو بھی سراہا۔
ذرائع کا کہنا ہے کہ آرمی چیف جنرل راحیل شریف وزیرِاعظم کی سربراہی میں ہونے والے اجلاس میں بھی شریک ہوں گے۔
